സംസ്ഥാന വ്യവസായ വാണിജ്യ അവാര്ഡുകള്ക്ക് അപേക്ഷ ക്ഷണിച്ചു
![](https://i0.wp.com/thodupuzhavartha.in/wp-content/uploads/2023/09/WhatsApp-Image-2023-09-11-at-23.28.35.jpeg?resize=780%2C470&ssl=1?v=1694500136)
![](https://i0.wp.com/thodupuzhavartha.in/wp-content/uploads/2024/06/thodupuzha-second-one.jpg?resize=708%2C397&ssl=1)
തിരുവനന്തപുരം: സംസ്ഥാനത്തെ വ്യവസായ സംരംഭങ്ങളെ പ്രോത്സാഹിപ്പിക്കുന്നതിനും അവയുടെ സംഭാവനകളെ അംഗീകരിക്കുന്നതിനുമായി വ്യവസായ വാണിജ്യ വകുപ്പ് സംഘടിപ്പിക്കുന്ന അവാര്ഡുകള്ക്ക് അപേക്ഷ ക്ഷണിച്ചു. സംസ്ഥാന – ജില്ലാ തലത്തില് മികച്ച പ്രവര്ത്തനം അര്ഹരായ സംരംഭങ്ങള്ക്കാണ് പുരസ്കാരങ്ങള് നല്കുന്നത്. സൂക്ഷ്മ, ചെറുകിട, ഇടത്തരം, ലാര്ജ് ആന്ഡ് മെഗാ വിഭാഗത്തില് ഉത്പാദന, സേവന, വ്യാപാര മേഖലകളില് പ്രവര്ത്തിക്കുന്ന സംരംഭങ്ങള്, കയറ്റുമതി അധിഷ്ഠിത സംരംഭങ്ങള്, ഉത്പാദന സ്റ്റാര്ട്ടപ്പുകള്, വനിത, പട്ടികജാതി, പട്ടികവര്ഗ, ട്രാന്സ് ജെന്ഡര് സംരംഭങ്ങള്ക്ക് പുരസ്കാരങ്ങള് നല്കും.
സംസ്ഥാനത്തെ വ്യവസായ വാണിജ്യ മേഖലയ്ക്കും സമൂഹത്തിനും നല്കിയ മികച്ച സംഭാവനകളെ മുന്നിര്ത്തി ലൈഫ് ടൈം അച്ചീവ്മെന്റ് അവാര്ഡും നല്കുന്നതാണ്. 2021-22 സാമ്പത്തിക വര്ഷം വരെയുള്ള പ്രകടനത്തെ അടിസ്ഥാനമാക്കിയാണ് സംരംഭങ്ങളെ തെരഞ്ഞെടുക്കുക. സംരംഭക വര്ഷം 2022-23 പദ്ധതിയുടെ ഭാഗമായി മികച്ച പ്രവര്ത്തനത്തങ്ങള് നടത്തിയ തദ്ദേശ സ്വയംഭരണ സ്ഥാപനങ്ങള്ക്കും ജില്ലാ വ്യവസായ കേന്ദ്രങ്ങള്ക്കും പുരസ്കാരം നല്കും. അപേക്ഷ സമര്പ്പിക്കേണ്ട അവസാന തീയതി സെപ്റ്റംബര് 23. ഓണ്ലൈന് സംവിധാനത്തിലൂടെയാണ് അവാര്ഡിന് അര്ഹമായ സംരംഭങ്ങളെയും സ്ഥാപനങ്ങളെയും തെരഞ്ഞെടുക്കുന്നത്. വിശദ വിവരങ്ങള്ക്കും അപേക്ഷകള് സമര്പ്പിക്കുന്നതിനുമായി http://awards.industry.kerala.gov.in സന്ദര്ശിക്കുക.
![](https://i0.wp.com/thodupuzhavartha.in/wp-content/uploads/2024/07/poster-thodupuzha-new-one-1-scaled.jpg?resize=708%2C2339&ssl=1)