വണ്ണപ്പുറം: മദ്യപിച്ചെത്തി പൊതു സ്ഥലത്ത് അസഭ്യം പറഞ്ഞ സംഭവത്തിൽ തൊമ്മൻകുത്ത് പാൽ ഉത്പാദക സംഘം ജീവനക്കാരനെതിരെ പോലീസ് കേസെടുത്തു. സംഘത്തിൽ മദ്യപിച്ചെത്തി വാക്കുതർക്കം ഉണ്ടാക്കുകയും പരസ്യമായി അസഭ്യം പറയുകയും ചെയ്തതിനാണ് ജീവനക്കാരനായ ഷൈനിനെതിരെ കരിമണ്ണൂർ പോലീസ് കേസെടുത്തത്. ശനിയാഴ്ച രാവിലെയാണ് സംഭവം. ബഹളം കേട്ടെത്തിയ നാട്ടുകാർ അറിയിച്ചതിനെ തുടർന്ന് കരിമണ്ണൂർ പോലീസ് എത്തി ഇയാളെ കസ്റ്റഡിയിൽ എടുക്കുകയായിരുന്നു. ഇതിനു മുൻപും ഇവിടെ ഇത്തരം സംഭവം ഉണ്ടായിട്ടുണ്ടെന്ന് സംഘത്തിലെ അംഗങ്ങളും സമീപവാസികളും പറഞ്ഞു.
