മുംബൈ: ആഭ്യന്തര വ്യോമയാന യാത്രക്കാരുടെ എണ്ണത്തിൽ 2023ലെ ആദ്യ എട്ട് മാസങ്ങളിൽ മികച്ച വളർച്ച. 2023 ജനുവരി മുതൽ ഓഗസ്റ്റ് വരെ ആഭ്യന്തര യാത്രക്കാരുടെ എണ്ണം 1190.62 ലക്ഷത്തിലെത്തിയതായി വ്യോമയാന മന്ത്രാലയത്തിന്റെ ഏറ്റവും പുതിയ കണക്കുകൾ വ്യക്തമാക്കുന്നു. മുൻ വർഷം ഇതേ കാലയളവിനെ അപേക്ഷിച്ച്‌ 38.27ശതമാനം വർധനയാണ് രേഖപ്പെടുത്തിയിരിക്കുന്നത്. ഓഗസ്റ്റ് മാസത്തിൽ മാത്രം 23.13 ശതമാനം എന്ന മികച്ച പ്രതിമാസ വളർച്ചാ നിരക്ക് രേഖപ്പെടുത്തി.
യാത്രക്കാരുടെ എണ്ണം 148.27 ലക്ഷമായി ഉയർന്നു എന്നത് ശ്രദ്ധേയമാണ്. യാത്രക്കാരുടെ വർധനവ് ആഗോള പാൻഡെമിക് ഉയർത്തുന്ന വെല്ലുവിളികളിൽ നിന്നുള്ള വ്യവസായത്തിന്റെ വീണ്ടെടുപ്പിനെ പ്രതിഫലിപ്പിക്കുന്നു. 2023 ഓഗസ്റ്റിൽ ഷെഡ്യൂൾ ചെയ്ത ആഭ്യന്തര എയർലൈനുകളുടെ മൊത്തത്തിലുള്ള റദ്ദാക്കൽ നിരക്ക് വെറും 0.65% മാത്രമായിരുന്നു. ഓഗസ്റ്റിൽ, ഷെഡ്യൂൾ ചെയ്ത ആഭ്യന്തര എയർലൈനുകൾക്ക് ആകെ 288 യാത്രക്കാരുമായി ബന്ധപ്പെട്ട പരാതികൾ മാത്രമാണ് ലഭിച്ചത്.ഈ കുറഞ്ഞ പരാതിയും റദ്ദാക്കൽ നിരക്കും ഉപഭോക്തൃ സംതൃപ്തിക്ക് മുൻഗണന നൽകുന്നു എന്നതിനുള്ള തെളിവാണെന്ന് വിലയിരുത്തപ്പെടുന്നു.വ്യോമയാന മേഖലയിലെ വളർച്ചയെ കേന്ദ്ര സിവിൽ ഏവിയേഷൻ മന്ത്രി ജ്യോതിരാദിത്യ സിന്ധ്യ അഭിനന്ദിച്ചു.സുരക്ഷിതവും കാര്യക്ഷമവുമായ പ്രവർത്തനം വളർത്തിയെടുക്കുന്നതിൽ എയർലൈനുകളുടെയും വിമാനത്താവളങ്ങളുടെയും സിവിൽ ഏവിയേഷൻ മന്ത്രാലയത്തിന്റെയും കൂട്ടായ പരിശ്രമത്തിന്റെ തെളിവാണ് ഈ സ്ഥിരതയുള്ള വളർച്ചയെന്ന് അദ്ദേഹം അഭിപ്രായപ്പെട്ടു.
