തൊടുപുഴ: ചികിത്സാചെലവ് നിഷേധിച്ച കാൻസർ രോഗിക്ക് ഇൻഷുറൻസ് കമ്പനി മതിയായ നഷ്ടപരിഹാരം നൽകാൻ ഇടുക്കി ഉപഭോക്തൃ തർക്കപരിഹാര കമ്മീഷൻ ഉത്തരവിട്ടു. കീരിക്കോട് സ്വദേശിയായ ഇഞ്ചക്കാട്ട് ആർ. മോഹനന്റെ ഭാര്യക്ക് ന്യൂ ഇന്ത്യ അഷ്വറൻസ് കന്പനിയാണ് ചികിത്സാചെലവ് നൽകേണ്ടത്. മോഹനൻ ന്യൂ ഇന്ത്യ അഷ്വറൻസ് കന്പനിയുടെ കുടുംബാരോഗ്യ ഇൻഷുറൻസ് പദ്ധതിയിൽ അംഗമായിരുന്നു. എന്നാൽ, കാൻസർ രോഗിയായ ഭാര്യയുടെ ചികിത്സാചെലവ് ലഭിക്കുന്നതിനുളള അപേക്ഷ കന്പനി നിരാകരിച്ചതിനെതിരേ മോഹനൻ ഇടുക്കി ഉപഭോക്തൃ തർക്ക പരിഹാര കമ്മീഷനിൽ പരാതി നൽകുകയായിരുന്നു. നടപടികൾ പൂർത്തീകരിച്ച കമ്മീഷൻ പരാതിക്കാരന് ഇൻഷുറൻസ് തുക ലഭിക്കാൻ അർഹനാണെന്ന് കണ്ടെത്തി. നിരാകരിച്ച തുകയായ 1,25,870 രൂപ അപേക്ഷിച്ച ദിവസം മുതലുള്ള പലിശ സഹിതവും നഷ്ടപരിഹാരമായി 30,000 രൂപയും വ്യവഹാര ചെലവിലേക്കായി 5,000 രൂപയും പരാതിക്കാരന് ഇൻഷുറൻസ് കന്പനി നൽകണമെന്നാണ് കമ്മീഷൻ ഉത്തരവിട്ടത്.
