അന്തർദേശീയ നിലവാരമുള്ള സംരംഭകർ രാജ്യപുരോഗതിക്ക് പുത്തൻ ദിശാബോധം നൽകും: മന്ത്രി ആന്‍റണി രാജു
തൊടുപുഴ: അന്തർദേശീയ നിലവാരമുള്ള സംരംഭകർ രാജ്യപുരോഗതിക്ക് പുത്തൻ ദിശാബോധം നൽകുമെന്ന് മന്ത്രി ആന്‍റണി രാജു. ന്യൂമാൻ കോളേജിൽ ഗ്ലോബൽ ബിസിനസ് ഇന്നവേഷൻ ആൻഡ് ഇൻകുബേഷൻ സെന്‍ററിന്‍റെ ഉദ്ഘാടനം നിർവഹിക്കുകയായിരുന്നു അദ്ദേഹം. നൈപുണ്യമുള്ള യുവതലമുറയെ വാർത്തെടുക്കാനും രാജ്യത്തിന്‍റെ സാന്പത്തിക സാമൂഹ്യ-സാംസ്കാരിക വികസനത്തിന് വഴി തെളിക്കാനും സെന്‍റർ ഇടയാക്കും. ഇതു മറ്റുകലാലയങ്ങൾക്കും സർവകലാശാലകൾക്കും പിന്തുടരാൻ കഴിയുമെന്നും അദ്ദേഹം പറഞ്ഞു. യോഗത്തിൽ കോളജ് മാനേജർ മോണ്. പയസ് മലേക്കണ്ടത്തിൽ അധ്യക്ഷത വഹിച്ചു. പി.ജെ. ജോസഫ് എംഎൽഎ ആമുഖപ്രഭാഷണവും എൻഡോവ്മെന്റ് വിതരണവും കുട്ടിക്കാനം മരിയൻ കോളജ് പ്രിൻസിപ്പലും ന്യൂമാൻ കോളജ് പൂർവവിദ്യാർഥിയുമായ ഡോ. അജിമോൻ ജോർജ് മുഖ്യപ്രഭാഷണവും നടത്തി. സപ്പോർട്ട് ലിങ്ക്സ് സിഇഒ സജി ഇട്ടൂപ്പ് തോമസ് പദ്ധതി വിശദീകരിച്ചു. മൂവാറ്റുപുഴ ബ്ലോക്ക് പഞ്ചായത്ത് പ്രസിഡന്‍റ് പ്രഫ. ജോസ് അഗസ്റ്റിൻ, ഡിപോൾ പബ്ലിക് സ്കൂൾ പ്രിൻസിപ്പൽ ഫാ. സിബി ജോണ്, ന്യൂമനൈറ്റ്സ് പ്രസിഡന്‍റ് അഡ്വ. ഇ.എ. റഹിം, ബർസാർ ഫാ. ബെൻസണ്‍ ആന്‍റണി തുടങ്ങിയവർ പ്രസംഗിച്ചു. പ്രിൻസിപ്പൽ ഡോ. ബിജിമോൾ തോമസ് സ്വാഗതവും കൊമേഴ്സ് വിഭാഗം മേധാവി ക്യാപ്റ്റൻ പ്രജീഷ് സി. മാത്യു നന്ദിയും പറഞ്ഞു.
