മൂലമറ്റം: വെള്ളിയാഴ്ച പെയ്ത കനത്ത മഴയിൽ മൂലമറ്റം ടൗണ്‍ വെള്ളത്തിൽ മുങ്ങി. ടൗണിൽ വെള്ളക്കെട്ടുണ്ടായതോടെ വാഹനഗതാഗതം മുടങ്ങി. ബസ് സ്റ്റാൻഡിലും ഏതാനും വ്യാപാര സ്ഥാപനങ്ങളിലും വെള്ളം കയറി. ഓടകൾ അടഞ്ഞതും വെള്ളം ഒഴുകാൻ സ്ഥലമില്ലാതെ വന്നതുമാണ് ടൗണ്‍ വെള്ളത്തിൽ മുങ്ങാൻ കാരണം. ടൗണിൽ സ്ഥിതിചെയ്യുന്ന വനിതാ വികസന വിപണന കേന്ദ്രത്തിന്‍റെ താഴത്തെ നിലയിൽ വെള്ളം കയറി. രണ്ട് തോടിനോടു ചേർന്നാണ് ഈ കെട്ടിടം നിർമിച്ചിരിക്കുന്നത്. രണ്ട് തോട്ടിലെയും വെള്ളം ഒഴുകിപ്പോകാൻ കോണ്ക്രീറ്റ് ചെയ്തിട്ടുണ്ടെങ്കിലും ഇതു കവിഞ്ഞ് വെള്ളം ഒഴുകുകയായിരുന്നു. തോടുകളും ഓടയും കൈയേറുന്നതാണ് വെള്ളക്കെട്ടിനു കാരണമെന്ന് നാട്ടുകാർ ആരോപിച്ചു
