സഹകരണ എക്സ്പോ എറണാകുളം മറൈന്‍ഡ്രൈവില്‍ 18ന് ആരംഭിക്കും.
കൊച്ചി: സഹകരണ മേഖലയിലെ ഏറ്റവും പുതിയ പ്രവര്‍ത്തനങ്ങളും ഉത്പന്നങ്ങളും പരിചയപ്പെടുത്തുന്നതിനായി നടത്തുന്ന സഹകരണ എക്സ്പോ എറണാകുളം മറൈന്‍ഡ്രൈവില്‍ 18ന് ആരംഭിക്കും. ഉദ്ഘാടനം വൈകിട്ട് മുഖ്യമന്ത്രി പിണറായി വിജയന്‍ ഉദ്ഘാടനം നിർവഹിക്കും. മന്ത്രി വി.എന്‍. വാസവന്‍ അധ്യക്ഷത വഹിക്കുന്ന ചടങ്ങില്‍ പ്രതിപക്ഷ നേതാവ് വി.ഡി. സതീശന്‍ മുഖ്യാതിഥിയാകും. സ്റ്റാളുകളുടെ ഉദ്ഘാടനം മന്ത്രി പി. രാജീവ് നിര്‍വഹിക്കും. ജില്ലയിലെ എംപിമാര്‍, എംഎല്‍എമാര്‍ തുടങ്ങിയവരും പങ്കെടുക്കും.
60,000 ചതുരശ്ര അടിയില്‍ 210 പവലിയനുകളാണ് മേളയില്‍ സജ്ജമാക്കിയിട്ടുള്ളത്. യുഎല്‍സിസിഎസ്, മില്‍മ, മത്സ്യഫെഡ്, റെയ്ഡ് കോ, റബ്‌കോ, കണ്‍സ്യൂമര്‍ഫെഡ്, കേര ഫെഡ്, എന്‍എംഡിസി, കേരള ബാങ്ക് എന്നിവയ്ക്കു പുറമെ പ്രാഥമിക കാര്‍ഷിക സഹകരണ സംഘങ്ങള്‍, ഉത്പാദക സഹകരണ സ്ഥാപനങ്ങള്‍ തുടങ്ങിയവയും, എട്ട് യുവജന സഹകരണ സംഘങ്ങളും, 8000 സ്‌ക്വയര്‍ ഫീറ്റില്‍ ഭക്ഷണ വൈവിധ്യങ്ങളുമായി ഫുഡ് കോര്‍ട്ടും എക്‌സ്‌പോയുടെ ഭാഗമായി മേളയില്‍ അണിനിരക്കും.
രാവിലെ 9.30 മുതല്‍ രാത്രി 8.30 വരെയായിരിക്കും എക്സ്പോ നടക്കുക. പ്രവേശനം പൂര്‍ണമായും സൗജന്യമാണെന്ന് മന്ത്രി വി.എന്‍. വാസവന്‍ വാർത്താസമ്മേളനത്തില്‍ പറഞ്ഞു. എക്സ്പോ 25ന് സമാപിക്കും.
