വെള്ളിയാമറ്റം : കനത്ത മഴയില്‍ തടിയനാല്‍ നാളിയാനി റോഡ് ഇടിഞ്ഞു താഴ്ന്നു. ഇതിനു താഴ് ഭാഗത്തുള്ള കാപ്പിത്തോട്ടത്തില്‍ വെള്ളാന്‍, ഇല്ലിക്കാട്ടില്‍ രാജമ്മ എന്നിവരുടെ വീടുകള്‍ക്ക്
അപകടഭീഷണിയുണ്ട്. വെള്ളിയാമറ്റം ലത്തീന്‍ പള്ളി റോഡിലുള്ള പാലത്തിനു സമീപം ചെരിപ്പുറം കോളനിയില്‍ സംരക്ഷണഭിത്തി ഇടിഞ്ഞതിനെത്തുടര്‍ന്ന് വീടുകള്‍ അപകടാവസ്ഥയിലായി. കോഴിപ്പിള്ളിയിലെ കമ്യൂണിറ്റി ഹാളിന് മുകളിലേക്കു മണ്ണിടിഞ്ഞു വീണു. ഇവിടെയാണ് അങ്കണവാടി പ്രവര്‍ത്തിച്ചിരുന്നത്. കോഴിപ്പള്ളി-കുളമാവ് റോഡിലേക്കു മണ്ണിടിഞ്ഞു വീണതിനെത്തുടര്‍ന്ന് ഗതാഗതം തടസപ്പെട്ടു. ഇന്നലെ മണ്ണുമാന്തിയന്ത്രം എത്തിച്ച് തടസം നീക്കി. പന്നിമറ്റത്ത് വടക്കനാറിന് കുറുകെയുണ്ടായിരുന്ന നടപ്പാലം ഒടിഞ്ഞു തകര്‍ന്ന നിലയിലാണ്. ഇപ്പോള്‍ ഇതിനോട് ചേര്‍ന്നുള്ള ചപ്പാത്ത് വഴിയാണ് വാഹനങ്ങളും നാട്ടുകാരും സഞ്ചരിക്കുന്നത്. വടക്കനാറില്‍ വെള്ളം ഉയര്‍ന്നതോടെ ചപ്പാത്തും മുങ്ങി. മുമ്പ് ചപ്പാത്തില്‍ വെള്ളം കയറുമ്പോള്‍ മറുകര കടക്കാന്‍ നടപ്പാലം ഉപയോഗിച്ചിരുന്നു. ഇത് തകര്‍ന്നതോടെ ചപ്പാത്ത് മുങ്ങുമ്പോള്‍ ആളുകള്‍ ഇരുകരയിലും കുടുങ്ങുന്ന അവസ്ഥയാണ്.
