തൊടുപുഴ: 33 ാമത് ഇടുക്കി റവന്യു ജില്ലാ കലോത്സവം-ഉണർവിന് തൊടുപുഴ മുതലക്കോടം സെന്‍റ് ജോർജ് ഹയർസെക്കൻഡറി സ്കൂളിൽ തുടക്കം . ഏഴ് ഉപജില്ലകളിൽനിന്നായി 3500 ഓളം വിദ്യാർഥികൾ 200ഓളം ഇനങ്ങളിലാണ് മാറ്റുരക്കുന്നത്. ബുധനാഴ്ച രാവിലെ 9.30ന് ഡി.ഡി.ഇ പതാക ഉയർത്തി. ഔപചാരിക ഉദ്ഘാടനം വ്യാഴാഴ്ച രാവിലെ 9.30ന് ഒന്നാം വേദിയായ പാരിഷ് ഹാളിൽ ഡീൻ കുര്യാക്കോസ് എം.പിയാണ് നിർവഹിക്കുന്നത്. പി.ജെ. ജോസഫ് എം.എൽ.എ അധ്യക്ഷത വഹിക്കും. പാരിഷ്ഹാൾ, സെന്‍റ് ജോർജ് എച്ച്.എസ് ഓഡിറ്റോറിയം, സെന്‍റ് ജോർജ് എച്ച്.എസ്.എസ് ഓഡിറ്റോറിയം, സേക്രഡ് ഹാർട്ട് ജി.എച്ച്.എസ് ഓഡിറ്റോറിയം, സേക്രഡ് ഹാർട്ട് ജി.എച്ച്.എസ് ഓപ്പൺ സ്റ്റേജ്, സെന്‍റ് ജോർജ് എച്ച്.എസ് ഓപ്പൺ സ്റ്റേജ് എന്നിവയാണ് വേദികകൾ. ആദ്യ ദിനം വയലിൻ, ഗിത്താർ, പദ്യം ചൊല്ലൽ, പ്രസംഗം, ബാൻഡ്, ചെണ്ട, ചിത്ര രചന തുടങ്ങിയ മത്സരങ്ങളാണ് നടന്നത്. കോവിഡ് മഹാമാരിക്ക് ശേഷം കടന്നു വന്ന മേളക്ക് പരമാവധി സൗകര്യങ്ങൾ സംഘാടക സമിതി ഒരുക്കിയിട്ടുണ്ട്.
