ഇന്ത്യയുടെ ആദ്യ സൂര്യ പഠന ദൗത്യമായ ആദിത്യ എല് 1 വിക്ഷേപിച്ചു
![](https://i0.wp.com/thodupuzhavartha.in/wp-content/uploads/2023/09/WhatsApp-Image-2023-09-01-at-23.50.25.jpeg?resize=780%2C470&ssl=1?v=1693637709)
![](https://i0.wp.com/thodupuzhavartha.in/wp-content/uploads/2024/06/thodupuzha-second-one.jpg?resize=708%2C397&ssl=1)
ശ്രീഹരിക്കോട്ട: ഇന്ത്യയുടെ ആദ്യ സൂര്യ പഠന ദൗത്യമായ ആദിത്യ എല് 1 വിക്ഷേപിച്ചു. ശ്രീഹരിക്കോട്ടയിലെ രണ്ടാം നമ്പര് ലോഞ്ച് പാഡില് നിന്ന് രാവിലെ 11.50 ഓടെയാണ് വിക്ഷേപണം നടന്നത്. പിഎസ്എല്വി സി 57 ആണ് വിക്ഷേപണ വാഹനം. ഭൂമിയില് നിന്ന് 15 ലക്ഷം കിലോമീറ്റര് അകലെ ഒന്നാം ലഗ്രാഞ്ച് പോയിന്റിലേക്കാണ് പേടകത്തെ അയക്കുന്നത്. എല് വണ്ണിന് ചുറ്റമുള്ള ഹാലോ ഓര്ബിറ്റില് പേടകത്തെ സ്ഥാപിക്കുകയാണ് ലക്ഷ്യം. ആദിത്യയുടെ ആദ്യ 3 ഘട്ടങ്ങള് വിജയകരമായി പിന്നിട്ടു. പേലോഡുകള് വിജയകരമായി വേര്പെട്ടതായി ഐഎസ്ആര്ഒ അറിയിച്ചു.
ചന്ദ്രനെ തൊട്ട് പത്ത് നാള് തികയും മുമ്പ് മറ്റൊരു സുപ്രധാന ദൗത്യം നടത്തിയിരിക്കുകയാണ് ഐഎസ്ആര്ഒ. സൂര്യനെ പഠിക്കാനുള്ള ആദിത്യ എല് 1, ഇസ്രൊയുടെ മറ്റ് ദൗത്യങ്ങളില് നിന്ന് ഏറെ വ്യത്യസ്തമാണ്. ഇസ്രൊയ്ക്കപ്പുറമുള്ള ശാസ്ത്ര സ്ഥാപനങ്ങളുടെ പങ്കാളിത്തം മുതല് പോകുന്നയിടം വരെ ഈ ദൗത്യത്തെ വേറിട്ട് നിര്ത്തുന്നു. സൂര്യനെ പഠിക്കാനുള്ള ആദ്യ ഇന്ത്യന് ദൗത്യം. സൂര്യന്റെ കൊറോണയെ പറ്റിയും, കാന്തികമണ്ഡലത്തെ പറ്റിയും, സൂര്യസ്ഫോടനങ്ങളെ പറ്റിയും കൂടുതല് വിവരങ്ങള് ആദിത്യയിലൂടെ മനസിലാക്കാന് പറ്റുമെന്നാണ് പ്രതീക്ഷ. ആദിത്യയുടെ യാത്ര സൂര്യനെ അടുത്തറിയാനാണെങ്കിലും സൂര്യനിലേക്ക് നേരിട്ട് എത്തുകയില്ല. നമ്മുടെ സൗരയൂഥത്തിന്റെ ഊര്ജ കേന്ദ്രത്തെ ഒരു തടസവും കൂടാതെ നിരീക്ഷിക്കാന് പറ്റുന്നൊരിടമാണ് ആദിത്യയുടെ ലക്ഷ്യം. ഭൂമിയില് നിന്ന് 15 ലക്ഷം കിമീ അകലെയുള്ള ഹാലോ ഓര്ബിറ്റാണ് ആദിത്യ ലക്ഷ്യമിടുന്നത്.
![](https://i0.wp.com/thodupuzhavartha.in/wp-content/uploads/2024/07/thodupuzha-ad-1-scaled.jpg?resize=708%2C2115&ssl=1)