ഇടുക്കി: നായാട്ടിനിടെ വെടിയേറ്റു മരിച്ച ആദിവാസി യുവാവിന്റെ മൃതദേഹം കൂടെയുണ്ടായിരുന്നവര്‍ വനത്തില്‍ കുഴിച്ചിട്ടു. ഇടുക്കി ഇരുപതേക്കര്‍ കുടിയില്‍ മഹേന്ദ്രനാണ് മരിച്ചത്. കുഞ്ചിത്തണ്ണി സ്വദേശികളായ പ്രതികള്‍ കീഴടങ്ങി. മഹേന്ദ്രന് അബദ്ധത്തില്‍ വെടിയേല്‍ക്കുകയായിരുന്നുവെന്ന് പോലീസ് വ്യക്തമാക്കി. തുടര്‍ന്ന് കൂടെയുണ്ടായിരുന്നവര്‍ മൃതദേഹം പോതമേട് വനത്തില്‍ കുഴിച്ചിടുകയായിരുന്നു.കഴിഞ്ഞ മാസം 28 മുതലാണ് മഹേന്ദ്രനെ കാണാതായത്. തുടര്‍ന്ന് ബന്ധുക്കള്‍ രാജാക്കാട് പോലീസില്‍ പരാതി നല്‍കി. പോലീസ് അന്വേഷണം നടത്തി വരുന്നതിനിടെയാണ് മഹേന്ദ്രന് നായാട്ടിന് പോയതാണെന്ന വിവരം ലഭിച്ചത്. ഇതിന് പിന്നാലെ മഹേന്ദ്രനൊപ്പമുണ്ടായിരുന്ന രണ്ടുപേര്‍ പോലീസില്‍ കീഴടങ്ങി. ഇവരെ ചോദ്യം ചെയ്തപ്പോഴാണ് സംഭവം പുറത്തറിയുന്നത്. പോലീസ് സംഭവസ്ഥലത്തെത്തി പരിശോധന നടത്തി. സ്ഥലത്ത് കുഴിച്ചിട്ടതിന്റെ ലക്ഷണങ്ങളുണ്ട്. മണ്ണ് മാറ്റി പരിശോധിച്ചതിന് ശേഷമേ സംഭവം സ്ഥിരീകരിക്കാനാകുവെന്ന് പോലീസ് അറിയിച്ചു.
