നഗരസഭ മാലിന്യമുക്തമാക്കുന്നതിനായി ഹരിതമിത്രം ആപ്പ് വഴി സ്മാർട്ട് ഗാർബേജ് മോണിറ്ററിംഗ് സിസ്റ്റം
![](https://i0.wp.com/thodupuzhavartha.in/wp-content/uploads/2022/09/thodupuzha-municipality_710x400xt.jpg?resize=710%2C400&ssl=1?v=1663468148)
![](https://i0.wp.com/thodupuzhavartha.in/wp-content/uploads/2024/06/thodupuzha-second-one.jpg?resize=708%2C397&ssl=1)
തൊടുപുഴ: നഗരസഭയെ മാലിന്യമുക്തമാക്കുന്നതിന്റെ ഭാഗമായി ഹരിതമിത്രം ആപ്പ് വഴി സ്മാർട്ട് ഗാർബേജ് മോണിറ്ററിംഗ് സിസ്റ്റം നടപ്പിലാക്കുന്നു. ഹരിതകർമസേന വഴി അജൈവ പാഴ് വസ്തുക്കൾ കാര്യക്ഷമമായി ശേഖരിച്ചു ശാസ്ത്രീയമായ സംസ്കരണം ഉറപ്പുവരുത്തുന്നതിനുള്ള ഓണ്ലൈൻ നിരീക്ഷണ സംവിധാനമാണ് ഇത്. ഹരിതകർമസേന നിലവിൽ വീടുകളിലും സ്ഥാപനങ്ങളിലും എത്തി യൂസർഫീ കാർഡ് നൽകി അജൈവ വസ്തുക്കൾ ശേഖരിക്കുന്ന പ്രക്രിയ സാങ്കേതികവിദ്യയുടെ സഹായത്തോടെ കൂടുതൽ ലളിതമാക്കുകയും സുതാര്യമാക്കുകയും ചെയ്യുക എന്ന ലക്ഷ്യത്തോടെയാണ് പദ്ധതി ആവിഷ്കരിച്ചിരിക്കുന്നത്.
പ്ലേസ്റ്റോറിൽനിന്നു ഡൗണ്ലോഡ് ചെയ്തെടുക്കുന്ന ഹരിതമിത്രം ആപ്പ് വഴി പാഴ് വസ്തു ശേഖരണം, യൂസർ ഫീ പിരിക്കൽ, പരാതി-പരിഹാര സംവിധാനം തുടങ്ങി മാലിന്യനിർമാർജനവുമായി ബന്ധപ്പെട്ട എല്ലാ കാര്യങ്ങളും ജനങ്ങൾക്ക് അറിയാൻ സാധിക്കും. പദ്ധതിയുടെ ആദ്യഘട്ടം എന്ന നിലയിൽ സർവേ നടത്തി ക്യുആർ കോഡ് പതിപ്പിക്കുന്നതിനായി ഹരിതകർമസേന, കുടുംബശ്രീ ഓക്സിലറി ഗ്രൂപ്പ് അംഗങ്ങൾ എന്നിവരെയാണ് ചുമതലപ്പെടുത്തിയിരിക്കുന്നത്. ഇതിനായി റേഷൻ കാർഡ്, ആധാർ കാർഡ് എന്നിവ നൽകണം. ക്യുആർ കോഡ് വീടുകളിൽ മഴയും വെയിലും ഏൽക്കാത്ത സ്ഥലങ്ങളിൽ പതിപ്പിക്കണമെന്ന് അധികൃതർ അറിയിച്ചു.
![](https://i0.wp.com/thodupuzhavartha.in/wp-content/uploads/2024/07/poster-thodupuzha-new-one-2-scaled.jpg?resize=708%2C2339&ssl=1)