കരിമണ്ണൂര്‍: ജനകീയാസൂത്രണത്തിന്‍റെ രജതജൂബിലിയുടെ ഭാഗമായി കരിമണ്ണൂര്‍ പഞ്ചായത്തില്‍ രജതജൂബിലി ആഘോഷങ്ങള്‍ക്ക് തുടക്കമായി.ഒരുവര്‍ഷം നീണ്ടുനില്‍ക്കുന്ന ആഘോഷങ്ങള്‍ക്കാണ് തുടക്കം കുറിച്ചിരിക്കുന്നത്.
ഇതോടനുബന്ധിച്ചു നടന്ന ചടങ്ങില്‍ 1996 മുതല്‍ ജനപ്രതിനിധികളായിരുന്നവരെയും മുന്‍ ഭരണസമിതികളുടെ പ്രസിഡന്‍റുമാരായിരുന്ന ജെസി ജോസഫ് കുന്നപ്പിള്ളില്‍, ജോസഫ് മാത്യു വടക്കന്‍, ജോര്‍ജ് അഗസ്റ്റിന്‍, ഡി.ദേവസ്യ, ജനകീയാസൂത്രണ പ്രസ്ഥാനത്തിന്‍റെ പഞ്ചായത്ത് തല മുഖ്യപ്രചാരകരായിരുന്ന എന്‍. സദാനന്ദന്‍, എന്‍.ആര്‍.നാരായണന്‍, എം.വി.മത്തായി മലേപ്പറന്പില്‍ എന്നിവരെ മൊമ്മെന്റോ നല്‍കി ആദരിച്ചു.
പഞ്ചായത്ത് വൈസ് പ്രസിഡന്‍റ് സാന്‍സണ്‍ അക്കക്കാട്ട് അധ്യക്ഷത വഹിച്ചു. പ്രസിഡന്‍റ് റെജി ജോണ്‍സണ്‍ ഉദ്ഘാടനം ചെയ്തു.
സെക്രട്ടറി ഷിബു മാത്യു വിഷയാവതരണം നടത്തി. പഞ്ചായത്തംഗം ബൈജു വറവുങ്കല്‍ സ്വാഗതവും എം. സന്തോഷ്കുമാര്‍ നന്ദിയും പറഞ്ഞു. ഗ്രാമപഞ്ചായത്തംഗങ്ങള്‍, മുന്‍ അംഗങ്ങള്‍, വിവിധ രാഷ്ട്രീയകക്ഷി പ്രതിനിധികള്‍ തുടങ്ങിയവര്‍ പങ്കെടുത്തു.
