ഫോണില്‍ വിളിക്കുന്നവരെ അറിയാന്‍ ട്രൂകോളര്‍ വേണ്ട; പുതിയ സംവിധാനം നടപ്പാക്കനൊരുങ്ങി കേന്ദ്രസര്‍ക്കാര്‍
ഡല്‍ഹി: മൊബൈല്‍ഫോണിലേക്ക് വിളിക്കുന്നവരുടെ പേര് ദൃശ്യമാകാന്‍ ഇനി ട്രൂ കോളര്‍ ആപ്പ് വേണ്ടി വരില്ല. പുതിയ സംവിധാനം നടപ്പാക്കാനൊരുങ്ങി കേന്ദ്രസര്‍ക്കാര്‍. സിം കാര്‍ഡ് എടുക്കാന്‍ ഉപയോഗിച്ച തിരിച്ചറിയല്‍ രേഖയിലെ പേര് ദൃശ്യമാകുന്ന രീതിയിലാണ് പുതിയ സംവിധാനം ഒരുക്കുക. ഇതുമായി ബന്ധപ്പെട്ട കാര്യങ്ങള്‍ ചര്‍ച്ച ചെയ്ത് തീരുമാനിക്കാന്‍ ടെലികോം റെഗുലേറ്ററി അതോറിറ്റിയോട് (ട്രായ്) ആവശ്യപ്പെട്ടിരിക്കുകയാണ് കേന്ദ്ര ടെലികോം വകുപ്പ്. ആവശ്യമായ നടപടിക്രമങ്ങള്‍ ഉടന്‍ ആരംഭിക്കുമെന്ന് ട്രായ് ചെയര്‍മാന്‍ പറഞ്ഞു.
ഫോണില്‍ പേര് സേവ് ചെയ്തിട്ടില്ലെങ്കിലും അണ്‍ നോണ്‍ നമ്ബറില്‍ നിന്നുള്ള കോളുകള്‍ ആരുടേതാണെന്ന് സ്‌ക്രീനില്‍ ദൃശ്യമാകാന്‍ സഹായിക്കുന്ന സ്വകാര്യ ആപ്പാണ് ട്രൂ കോളര്‍. ട്രൂകോളര്‍ ഉപയോഗിക്കുന്നവരുടെ ഫോണിലെ കോണ്ടാക്ട് ലിസ്റ്റ് ഉപയോഗിച്ചാണ് ഈ സംവിധാനം പ്രവര്‍ത്തിക്കുന്നത്. ഏറ്റവും കൂടുതല്‍ പേര് സേവ് ചെയ്തിരിക്കുന്നത് എങ്ങിനെയാണോ അതാണ് ആപ്പിലൂടെ ദൃശ്യമാകുക. എന്നാല്‍ ടെലികോം വകുപ്പിന്റെ പുതിയ സംവിധാനം വഴി. തിരിച്ചറിയില്‍ രേഖയിലെ അതേ പേര് തന്നെയായിരിക്കും സ്‌ക്രീനില്‍ ദൃശ്യമാകുക.
