കരിമണ്ണൂർ പഞ്ചായത്ത് വേനപ്പാറയിൽ വാങ്ങിനൽകിയ സ്ഥലത്ത് പൂർത്തീകരിച്ച 44 വീടുകൾ അടങ്ങുന്ന ഭവനസമുച്ചയത്തിന്റെ ഉദ്ഘാടനം ഈ മാസം എട്ടിന്
![](https://i0.wp.com/thodupuzhavartha.in/wp-content/uploads/2023/04/images-18-1.jpeg?resize=768%2C400&ssl=1?v=1680794450)
![](https://i0.wp.com/thodupuzhavartha.in/wp-content/uploads/2024/06/thodupuzha-second-one.jpg?resize=708%2C397&ssl=1)
തൊടുപുഴ: ലൈഫ് മിഷൻ പദ്ധതിപ്രകാരം കരിമണ്ണൂർ പഞ്ചായത്ത് വേനപ്പാറയിൽ വാങ്ങിനൽകിയ സ്ഥലത്ത് പൂർത്തീകരിച്ച 44 വീടുകൾ അടങ്ങുന്ന ഭവനസമുച്ചയത്തിന്റെ ഉദ്ഘാടനം എട്ടിന് രാവിലെ 10.30നു മുഖ്യമന്ത്രി പിണറായി വിജയൻ ഓണ്ലൈനായി നിർവഹിക്കുമെന്ന് പഞ്ചായത്ത് പ്രസിഡന്റ് നിസാമോൾഷാജി, വൈസ് പ്രസിഡന്റ് സാൻസൻ അക്കക്കാട്ട് എന്നിവർ പത്രസമ്മേളനത്തിൽ അറിയിച്ചു.
മന്ത്രി റോഷി അഗസ്റ്റിൻ വേനപ്പാറയിൽ നടക്കുന്ന സമ്മേളനത്തിന്റെ ഉദ്ഘാടനവും ഗുണഭോക്താക്കൾക്ക് താക്കോൽദാനവും നിർവഹിക്കും. പി.ജെ.ജോസഫ് എംഎൽഎ അധ്യക്ഷത വഹിക്കും. ഡീൻ കുര്യാക്കോസ് എംപി മുഖ്യപ്രഭാഷണം നടത്തും. എംഎൽഎമാർ, ത്രിതല പഞ്ചായത്തംഗങ്ങൾ, രാഷ്ട്രീയ സാമൂഹ്യസാംസ്കാരിക പ്രതിനിധികൾ, കുടുംബശ്രീഅംഗങ്ങൾ, വ്യാപാരി വ്യവസായി പ്രതിനിധികൾ എന്നിവർ പങ്കെടുക്കും.
നാലുവർഷം മുന്പ് മുൻ വൈദ്യുതി മന്ത്രി എം.എം.മണിയാണ് ഫ്ളാറ്റ് സമുച്ചയത്തിന്റെ ശിലാസ്ഥാപനം നിർവഹിച്ചത്. ലൈറ്റ്ഗേജ് സ്റ്റീൽ ഫ്രെയിം ടെക്നോളജി ഉപയോഗിച്ച് സിമന്റും ഇഷ്ടികയുമില്ലാതെ കേരളത്തിൽ ആദ്യം പൂർത്തീകരിച്ച ഭവന സമുച്ചയമാണിത്. രണ്ട് കിടപ്പുമുറികളും ഹാളും അടുക്കളയും ബാൽക്കണിയും കുളിമുറിയും ശുചിമുറിയും അടങ്ങുന്നതാണ് 420 ചതുരശ്രയടി വിസ്തീർണമുള്ള ഓരോ വീടും. 44 വീടുകളിൽ രണ്ടെണ്ണം അങ്കണവാടിക്കും ആരോഗ്യപരിപാലന കേന്ദ്രത്തിനുമായി നീക്കിവച്ചിട്ടുണ്ട്.
ഫ്ളാറ്റ് സമുച്ചയത്തിന്റെ നിർമാണം പൂർത്തീകരിക്കുന്നതിനും അനുബന്ധ സൗകര്യങ്ങൾ ഒരുക്കുന്നതിനുമായി 7.85 കോടിയാണ് ചെലവഴിച്ചത്.
![](https://i0.wp.com/thodupuzhavartha.in/wp-content/uploads/2024/07/poster-thodupuzha-new-one-2-scaled.jpg?resize=708%2C2339&ssl=1)