തൊടുപുഴ: വീടിനുള്ളില്‍ മുറിയില്‍ കുടങ്ങിയ മൂന്ന് വയസുകാരന് ഫയര്‍ഫോഴ്‌സ് രക്ഷകരായി. ഇന്ന് രാവിലെ 10ന് തൊടുപുഴ ആലക്കോടാണ് സംഭവം. ഒടുവില്‍ അഗ്‌നിരക്ഷാ സേനയെത്തിയാണ് കുട്ടിയെ പുറത്തെത്തിച്ചത്. ആലക്കോട് ഇടക്കര മൈക്കിള്‍ – അനു ദമ്പതികളുടെ മകനാണ് മുറിയില്‍ കുടുങ്ങിയത്. പാല് കാച്ചല്‍ ചടങ്ങിന്റെ തിരക്കിലായിരുന്നു വീട്ടുകാര്‍. ഈ സമയത്ത് മുറിയില്‍ കയറിയ കുട്ടി മുറിയുടെ വാതിലിന്റെ ലോക്ക് അകത്ത് നിന്നും പൂട്ടിയതാണ് പ്രശ്‌നമായത്. വീട്ടുകാര്‍ ശ്രമിച്ചിട്ടും വാതില്‍ തുറക്കാനായില്ല. ഇതോടെ സംഭവം തൊടുപുഴയിലെ അഗ്‌നിരക്ഷാസേനയെ അറിയിച്ചു. തൊടുപുഴയില്‍ നിന്നും എത്തിയ സേനാംഗങ്ങളാണ് ലോക്ക് തുറന്ന് കുട്ടിയെ രക്ഷപെടുത്തിയത്.
