തൊടുപുഴ: ജില്ലയിൽ മഴ തുടരുന്ന സാഹചര്യത്തിൽ കെഎസ്ആർടിസിയുടെ വരുമാനത്തിലും ഇടിവ്. പ്രതിസന്ധി മറികടക്കാൻ കളക്ഷൻ കുറവുള്ള സർവീസുകൾ താത്കാലികമായി നിർത്താൻ കെഎസ്ആർടിസി നീക്കം തുടങ്ങി.
ജില്ലയിലെ വിവിധ ഡിപ്പോകളിൽ നിന്നായി 15 സർവീസുകൾ വെട്ടിക്കുറയ്ക്കാനാണ് ആലോചന. ദിവസങ്ങളായി തുടരുന്ന മഴ കാരണം ദിവസവരുമാനത്തിൽ വൻ കുറവാണ് പല ഡിപ്പോകളിലും ഉണ്ടാകുന്നതെന്ന് കെഎസ്ആർടിസി അധികൃതർ പറയുന്നു. 10,000 രൂപയോളം ഡീസലിന് ചെലവായിട്ടും കളക്ഷൻ 3000 ത്തിനും 4000 ത്തിനും ഇടയിലാണ്. ഇത് അധിക ബാധ്യതയാണ് സൃഷ്ടിക്കുന്നത്. ദിവസങ്ങളായി ഹൈറേഞ്ച് മേഖലയിൽ ദീർഘദൂര സർവീസുകൾ ഈ പ്രതിസന്ധി നേരിടുകയാണ്. കളക്ഷനിൽ വൻ കുറവു നേരിടുന്ന ഞായറാഴ്ചകളിൽ ഭൂരിഭാഗം സർവീസുകളും മുടങ്ങാനാണ് സാധ്യത.
വരുമാനം തീരെ കുറവുള്ള സർവീസുകളാണ് വെട്ടിക്കുറയ്ക്കുന്നത്. ഗ്രാമീണ മേഖലകളിലടക്കം രാവിലെയും വൈകുന്നേരവുമുള്ള അവശ്യ സർവീസുകൾ മുടക്കില്ല. ഇത്തരം ഷെഡ്യൂളുകളുടെ കണക്ക് കെഎസ്ആർടിസി ശേഖരിച്ചുവരികയാണ്. മൂന്നാറിലും മൂലമറ്റത്തും രണ്ട് സർവീസുകൾ വീതവും തൊടുപുഴയിൽ നാലും സർവീസുകൾ ഉൾപ്പെടെയാണ് 15 എണ്ണം താത്കാലികമായി വെട്ടിക്കുറക്കുന്നത്. മറ്റു ചില റൂട്ടുകളിലെ ട്രിപ്പുകളും വെട്ടിക്കുറച്ചേക്കും.
മഴ കനത്ത സാഹചര്യത്തിലാണ് ഇത്തരമൊരു നടപടിയെന്നും മഴ മാറുന്ന മുറക്ക് സർവീസുകൾ പുനസ്ഥാപിക്കുമെന്നുമാണ് കെഎസ്ആർടിസി അധികൃതർ പറയുന്നത്. അതേ സമയം മറ്റ് ജില്ലകളിലെപ്പോലെ ഡീസൽക്ഷാമം ഇടുക്കിയിൽ കഐസ്ആർടിസി സർവീസിനെ ബാധിച്ചിട്ടില്ലെന്നും അധികൃതർ അറിയിച്ചു.
