ജമ്മുകാഷ്മീരിൽ ഇടുക്കി സ്വദേശിയായ ജവാൻ കൊക്കയിൽ വീണു മരിച്ചു
![](https://i0.wp.com/thodupuzhavartha.in/wp-content/uploads/2021/12/IMG-20211215-WA0002.jpg?resize=780%2C470&ssl=1?v=1639538230)
![](https://i0.wp.com/thodupuzhavartha.in/wp-content/uploads/2024/06/thodupuzha-second-one.jpg?resize=708%2C397&ssl=1)
ചെറുതോണി: ജമ്മുകാഷ്മീരിൽ ഇടുക്കി കൊച്ചുകാമാക്ഷി സ്വദേശിയായ ജവാൻ കൊക്ക യിൽവീണു മരിച്ചു. കൊച്ചുകാമാക്ഷി വടുതലക്കുന്നേൽ അനീഷ് ജോസഫ് (47) ആണ് ജമ്മു- കാഷ്മീരിൽ ടെന്റിലുണ്ടായ സ്ഫോടനത്തിൽ കൊക്കയിൽവീണു മരിച്ചത്.ജമ്മു-കാഷ്മീരിൽ ബാരാമുള്ളയിലെ ബിഎസ്എഫ് ക്യാന്പിൽ സിംഗിൾ ടെന്റിൽ രാത്രി ജോലി നോക്കുന്പോൾ ടെന്റിൽ ചൂട് നിലനിർത്താനുപയോഗിക്കുന്ന മണ്ണെണ്ണ ഹീറ്റർ (ബുഖാരി) പൊട്ടിത്തെറിച്ചു തീപിടിത്തമുണ്ടായപ്പോൾ ടെന്റിനു പുറത്തേക്കു ചാടിയ അനീഷ് കൊക്കയിലേക്ക് പതിക്കുകയായിരുന്നു. വീഴ്ചയിൽ തലയ്ക്കു ഗുരുതരമായി പരിക്കേറ്റിരുന്നു. മറ്റ് ആക്രമണസാധ്യതകൾ സൈനിക തലത്തിൽ അന്വേഷിക്കും.മേലേകുപ്പച്ചാംപടി വടുതലക്കുന്നേൽ പരേതനായ ജോസഫ് ഈപ്പന്റെയും അമ്മിണിയുടെയും ഇളയ മകനായ അനീഷ് 20 വർഷത്തെ സൈനിക സേവനത്തിന് ശേഷം ഈ മാസം ഒടുവിൽ വിരമിക്കാനിരിക്കുകയായിരുന്നു. വിരമിച്ചു നാട്ടിലെത്തുന്നതിനു മുന്നോടിയായി കൊച്ചുകാമാക്ഷിയിൽ വീട് നവീകരണവും നടത്തിയിരുന്നു. സിആർ പിഎഫ് ഉദ്യോഗസ്ഥയായ ഭാര്യ സീനയും മക്കളായ എലന മരിയ അനീഷ് ( പ്ലസ് വണ് വിദ്യാർഥിനി), അലോണ മരിയ അനീഷ് (ആറാം ക്ലാസ് വിദ്യാർഥിനി) സീനയുടെ ജോലിസ്ഥലമായ ഗുജറാത്തിലായിരുന്നു താമസിച്ചിരുന്നത്. മൃതദേഹം ഇന്ന് നെടുന്പാശേരിയിലെത്തിച്ച് നാട്ടിലേക്കു കൊണ്ടുവരും.
സംസ്കാരം ബുധനാഴ്ച കൊച്ചുകാമാക്ഷി സ്നേഹഗിരി സെന്റ് സെബാസ്റ്റ്യൻസ് പള്ളിയിൽ. ഭാര്യ: സീന ഏബ്രഹാം കോഴിക്കോട് കൂരാച്ചുണ്ട് കാനാട്ട് കുടുംബാംഗമാണ്. സഹോദരങ്ങൾ: ജോളി, ഷേർളി, റെജി (സെന്റ് ആന്റണീസ് ഗ്യാസ് ഏജൻസി അടിമാലി),ആന്റോ.ധീരജവാന്റെ നിര്യാണത്തിൽ ഇടുക്കി രൂപതാധ്യക്ഷൻ മാർ ജോണ് നെല്ലിക്കുന്നേൽ അനുശോചിച്ചു.
![](https://i0.wp.com/thodupuzhavartha.in/wp-content/uploads/2024/07/thodupuzha-ad-1-scaled.jpg?resize=708%2C2115&ssl=1)