തൊടുപുഴ: കെഎസ്ആർടിസി ബസ് ടെർമിനൽ കം ഷോപ്പിംഗ് കോംപ്ലക്സിന്റെ ശേഷിക്കുന്ന നിർമാണ പ്രവൃത്തികൾ സമയബന്ധിതമായി പൂർത്തിയാക്കി കാലതാമസം കൂടാതെ ഡിപ്പോ തുറന്നുകൊടുക്കണമെന്ന് സംസ്ഥാന മനുഷ്യാവകാശ കമ്മീഷൻ അധ്യക്ഷൻ ജസ്റ്റിസ് ആന്‍റണി ഡൊമിനിക്ക് മാനേജിംഗ് ഡയറക്ടർക്ക് ഉത്തരവ് നൽകി.
ടെർമിനലിന്‍റെ പൂർത്തിയാകാനുള്ള ജോലികൾ എച്ച്എൽഎൽ ലൈഫ് കെയർ ലിമിറ്റഡിനെ ഏൽപ്പിച്ചതായി കെഎസ് ആർടിസി എംഡി കമ്മീഷനെ അറിയിച്ചു. നിർമ്മാണ പ്രവർത്തനങ്ങൾ ദ്രുതഗതിയിൽ നടന്നുവരുന്നതായും കമ്മീഷനു നൽകിയ റിപ്പോർട്ടിൽ വ്യക്തമാക്കിയിട്ടുണ്ട്. ഡോ പി. സി. അച്ചൻ കുഞ്ഞ്, മനോജ് കോക്കാട്ട്, ഡോ. ഗിന്നസ് മാടസാമി എന്നിവർ സമർപ്പിച്ച പരാതികളിലാണ് ഉത്തരവ്.
