തൊടുപുഴ: മണക്കാട് ഷെഡ്ഡിന് തീപിടിച്ച് ഒറ്റയ്ക്ക് താമസിച്ചിരുന്നയാൾ മരിച്ചു. അങ്കംവെട്ടി കളപ്പുര കോളനിയിൽ നമ്പേലിൽ ജോസഫാണ് (47) മരിച്ചത്. ഇന്നലെ രാത്രി എട്ടരയോടെയായിരുന്നു സംഭവം. അവിവാഹിതനായ ജോസഫ് പടുത വിരിച്ച ഷെഡ്ഡിലാണ് കഴിഞ്ഞിരുന്നത്. സംഭവത്തിന് തൊട്ടുമുമ്പ് അയൽപക്കത്ത് കുടുംബമായി താമസിക്കുന്ന സഹോദരി റീത്തയുടെ അടുത്തെത്തി കഴിക്കാൻ ചോറ് വേണമെന്ന് ആവശ്യപ്പെട്ടിരുന്നു. സഹോദരി അടുക്കളയിലേക്ക് പോയ സമയത്ത് ജോസഫ് തിരികെ ഷെഡ്ഡിലേക്ക് മടങ്ങി. തുടർന്ന് ഷെഡ്ഡിൽ നിന്ന് തീയാളുന്നതാണ് കണ്ടത്. നാട്ടുകാരുടെ നേതൃത്വത്തിൽ തീ ഏകദേശം അണച്ചപ്പോഴേക്കും തൊടുപുഴയിൽ നിന്ന് അഗ്നിരക്ഷാ സേന സ്ഥലത്തെത്തി. അപ്പോഴേക്കും ഷെഡ് പൂർണമായി കത്തി നശിച്ചിരുന്നു. അകത്ത് കയറിയ അഗ്നിരക്ഷാ സേനാംഗങ്ങളാണ് കട്ടിലിന് അടിയിൽ പൊള്ളലേറ്റ് മരിച്ച നിലയിൽ ജോസഫിന്റെ മൃതദേഹം കണ്ടത്. പൂർണമായും കത്തിക്കരിഞ്ഞ നിലയിലായിരുന്നു മൃതദേഹം. ഷെഡ്ഡ് കത്തുന്നതിനിടയിൽ ജീവനൊടുക്കുകയാണെന്ന് ജോസഫ് വിളിച്ച് പറഞ്ഞതായി നാട്ടുകാരിൽ ചിലർ മൊഴി നൽകിയിട്ടുണ്ടെന്ന് പൊലീസ് പറഞ്ഞു. മൃതദേഹം തൊടുപുഴ ജില്ലാ ആശുപത്രി മോർച്ചറിയിൽ. തൊടുപുഴ പൊലീസ് മേൽനടപടികൾ സ്വീകരിച്ചു.
