ഇടുക്കി : ഭരണഭാഷ -മലയാള ഭാഷ ജില്ലാ തല ഏകോപന സമിതിയുടെ അവലോകന യോഗം അഡീഷണല്‍ ഡിസ്ട്രിക്ട് മജിസ്‌ട്രേറ്റ് ബി ജ്യോതിയുടെ അധ്യക്ഷതയില്‍ ചേര്‍ന്നു. കളക്ട്രേറ്റ് കോണ്‍ഫറന്‍സ് ഹാളില്‍ നടന്ന യോഗത്തില്‍ വിവിധ വകുപ്പുകള്‍ ഭരണഭാഷ മലയാളത്തിലാക്കുന്നത് സംബന്ധിച്ച് നടത്തിയ പ്രവര്‍ത്തനങ്ങള്‍ വിലയിരുത്തി. ഉദ്യോഗസ്ഥ- ഭരണ പരിഷ്‌കാര ( ഔദ്യോഗിക ഭാഷ) വകുപ്പിലെ ഭാഷാവിദഗ്ധന്‍ ഡോ. ആര്‍ ശിവകുമാര്‍ ഭരണഭാഷാ രംഗത്തുണ്ടായിക്കൊണ്ടിരിക്കുന്ന നവമാറ്റങ്ങളെ പറ്റി വിശദീകരിച്ചു. ഇ-ഓഫീസിന്റെ പ്രാധാന്യം, ലിപിപരിഷ്‌കരണം, പുതിയ ഫോണ്ടുകള്‍, ഭരണഭാഷയില്‍ വാക്കുകള്‍ ശ്രദ്ധിച്ചുപയോഗിക്കുന്നതിലെ സൂക്ഷ്മതകള്‍, സര്‍ക്കാര്‍ നിര്‍ദ്ദേശങ്ങള്‍, കോടതി ഉത്തരവുകള്‍ തുടങ്ങിയവ സംബന്ധിച്ച് അദ്ദേഹം സംസാരിച്ചു. ഡെപ്യൂട്ടി കളക്ടര്‍ കെ മനോജ്, മറ്റ് വകുപ്പ് മേധാവികള്‍, ഉദ്യോഗസ്ഥര്‍ എന്നിവര്‍ പങ്കെടുത്തു.
