തൊടുപുഴ: മാർക്‌സിസ്റ്റ്-ലെനിനിസ്റ്റ് പാർട്ടി ഓഫ് ഇന്ത്യാ – റെഡ് ഫ്‌ളാഗ് ജില്ലാ കമ്മിറ്റി തൊടുപുഴയിൽ പാലസ്തീൻ ഐക്യദാർഢ്യസായാഹ്നം സംഘടിപ്പിച്ചു.”യുദ്ധം നിർത്തുക, പലസ്തീന്റെ സ്വതന്ത്ര പരമാധികാരം നടപ്പാക്കുക” എന്നീ മുദ്രാവാക്യങ്ങൾ ഉയർത്തിയായിരുന്നു ഐക്യദാർഢ്യസായാഹ്നം നടത്തിയത്. സംസ്ഥാന സെക്രട്ടറിയേറ്റംഗം എം.കെ. ദിലീപ് യോഗം ഉദ്ഘാടനം ചെയ്തു. യുദ്ധം ഉടൻ അവസാനിപ്പിച്ച് യു.എൻ പ്രമേയം അംഗീകരിച്ചതനുസരിച്ച് പലസ്തീന്റെ സ്വതന്ത്ര പരമാധികാരം നടപ്പാക്കണമെന്ന് അദ്ദേഹം പറഞ്ഞു.ജില്ലാ സെക്രട്ടറി ബാബു മഞ്ഞള്ളൂർ അധ്യക്ഷത വഹിച്ചു. 2016 ൽ പാലസ്തീൻ സന്ദർശിച്ച് ഐക്യദാർഢ്യം പ്രഖ്യാപിക്കുകയും ചെയ്ത യുവജനവേദി സംസ്ഥാന പ്രസിഡന്റ് സച്ചിൻ കെ. ടോമി മുഖ്യപ്രഭാഷണം നടത്തി. കെ.എ. സദാശിവൻ, ജോർജ് തണ്ടേൽ എന്നിവർ പ്രസംഗിച്ചു.
