തൊടുപുഴ: കേന്ദ്ര-സംസ്ഥാന സർക്കാരുകളുടെ ജനദ്രോഹ നടപടികൾക്കെതിരേ കെപിസിസി പ്രസിഡന്‍റ് കെ.സുധാകരൻ, പ്രതിപക്ഷ നേതാവ് വി.ഡി. സതീശൻ എന്നിവർ നയിക്കുന്ന സമരാഗ്നി യാത്ര 20, 21 തിയതികളിൽ ഇടുക്കി ജില്ലയിൽ പര്യടനം നടത്തുമെന്ന് ഡിസിസി പ്രസിഡന്‍റ് സി.പി. മാത്യു പത്രസമ്മേളനത്തിൽ അറിയിച്ചു. 20നു വൈകുന്നേരം അഞ്ചിനു ജില്ലാ അതിർത്തിയായ അച്ചൻകവലയിൽനിന്നു മങ്ങാട്ടുകവലയിലേക്കു യാത്രയെ സ്വീകരിച്ചാനയിക്കും. തുടർന്ന് അഞ്ചിനു പൊതു സമ്മേളനം.
21നു രാവിലെ പത്തിന് അടിമാലി ക്ലബിൽ സമൂഹത്തിലെ വിവിധ മേഖലകളിൽനിന്നു ക്ഷണിക്കപ്പെട്ട പ്രതിനിധികൾ പങ്കെടുക്കുന്ന ജനസദസ് നടത്തും. കെപിസിസി പ്രസിഡന്‍റും പ്രതിപക്ഷനേതാവും നേതൃത്വം നൽകും. ഉച്ചകഴിഞ്ഞു രണ്ടിന് അടിമാലി കോടതിപടിയിൽനിന്ന് അടിമാലി, കല്ലാർകുട്ടി റോഡ് ജംഗ്ഷനിലേക്കു യാത്രയെ ആനയിക്കും. തുടർന്നു രണ്ടിനു സമ്മേളനം. ചെറുതോണി വഴി കട്ടപ്പനയിലെത്തുന്ന യാത്രയെ നൂറുകണക്കിനാളുകൾ ചേർന്നു പഴയ ബസ് സ്റ്റാന്‍റിലേക്ക് സ്വീകരിച്ചാനയിക്കും. നാലിനു നടക്കുന്ന സമ്മേളനത്തിൽ വിവിധ നേതാക്കൾ പ്രസംഗിക്കും. ഭവന സന്ദർശനത്തിലൂടെ ജനങ്ങളിൽനിന്നു സ്വീകരിച്ച ഫണ്ട് മണ്ഡലം പ്രസിഡന്‍റുമാർ അതതുസമ്മേളന വേദിയിൽവച്ച് നേതാക്കൾക്ക് കൈമാറും. യാത്രയുടെ പ്രചാരണാർത്ഥം എല്ലാ മണ്ഡലങ്ങളിലും സമരാഗ്നി വിളംബര ജാഥ നടത്തും.
