തൊടുപുഴ: സിപിഎം 23-ാം പാർട്ടി കോണ്ഗ്രസിനു മുന്നോടിയായി തൊടുപുഴ ഏരിയ സമ്മേളനവും കെ.എസ്. കൃഷ്ണപിള്ളയുടെ രക്തസാക്ഷി ദിനാചരണവും ഇന്നും നാളെയുമായി വിവിധ പരിപാടികളോടെ സംഘടിപ്പിക്കുമെന്ന് ഭാരവാഹികൾ പത്രസമ്മേളനത്തിൽ അറിയിച്ചു. മർച്ചന്‍റ് ട്രസ്റ്റ് ഹാളിൽ ഇന്നു രാവിലെ പത്തിന് ജില്ലാ സെക്രട്ടറി കെ.കെ. ജയചന്ദ്രൻ സമ്മേളനം ഉദ്ഘാടനം ചെയ്യും.
ജില്ല സെക്രട്ടേറിയറ്റംഗങ്ങളായ കെ.വി. ശശി, പി.എസ്. രാജൻ, കെ.എസ്. മോഹനൻ, വി.എൻ. മോഹനൻ എന്നിവർ പ്രസംഗിക്കും.130 പ്രതിനിധികളും 17 ഏരിയ കമ്മിറ്റിയംഗങ്ങളും സമ്മേളനത്തിൽ പങ്കെടുക്കും.
27നു വൈകുന്നേരം നാലിന് സമ്മേളനഹാളിനു പുറത്തുനിന്നും മുനിസിപ്പൽ മൈതാനിയിലേക്ക് പ്രകടനം നടത്തും. തുടർന്നു നടക്കുന്ന പൊതുസമ്മേളനം സിപിഎം സംസ്ഥാന സെക്രട്ടേറിയറ്റംഗം എം.എം.മണി എംഎൽഎ ഉദ്ഘാടനം ചെയ്യും. സമ്മേളനത്തിനു ശേഷം തിരുവനന്തപുരം സൗപർണികയുടെ ഇതിഹാസം നാടകവും അരങ്ങേറും. സംസ്ഥാന കമ്മിറ്റിയംഗം കെ.പി. മേരി, ജില്ലാ സെക്രട്ടേറിയറ്റംഗം വി.വി. മത്തായി, ഏരിയ സെക്രട്ടറി മുഹമ്മദ് ഫൈസൽ, മുൻ സെക്രട്ടറി ടി.ആർ. സോമൻ, തൊടുപുഴ ഏരിയ കമ്മിറ്റിയംഗം കെ.ആർ. ഷാജി എന്നിവർ പത്രസമ്മേളനത്തിൽ പങ്കെടുത്തു.
