തൊടുപുഴ: താലൂക്കിൽ ഒരു വീട് പൂർണമായും 35-ഓളം വീടുകൾ ഭാഗികമായും തകർന്നു. കാരിക്കോട് വില്ലേജിലാണ് വീട് പൂർണമായി തകർന്നത്. ആറു വീടുകളുടെ സംരക്ഷണ ഭിത്തിയും തകർന്നു.
കെടുതി വ്യാപകമായുണ്ടായ മേഖലകളിൽനിന്നും ആളുകളെ മാറ്റിപ്പാർപ്പിക്കാനായി ദുരിതാശ്വാസ ക്യാന്പുകൾ തുറന്നു. മൂലമറ്റം ഐഎച്ച്ഡിപി സ്കൂൾ, പന്നിമറ്റം സെന്‍റ് ജോസഫ് സ്കൂൾ, വെള്ളിയാമറ്റം ക്രൈസ്റ്റ് നഗർ വിഎച്ച്എസ്, തൊടുപുഴ ഡയറ്റ്, കാഞ്ഞിരമറ്റം ഗവ. ഹയർസെക്കൻഡറി സ്കൂൾ എന്നിവിടങ്ങളിലാണ് ക്യാന്പുകൾ തുറന്നത്. മൂലമറ്റം ക്യാന്പിൽ ഇരുപതും പന്നിമറ്റത്ത് രണ്ടും വെള്ളിയാമറ്റത്ത് നാലും തൊടുപുഴ ഡയറ്റിൽ ഒന്നും കുടുംബങ്ങളെ മാറ്റി പാർപ്പിച്ചിട്ടുണ്ട്. ഇതിനു പുറമെ വെള്ളം കയറി ഒട്ടേറെ വീടുകളിലെ ഗൃഹോപകരണങ്ങൾ നശിച്ചു. വ്യാപകമായ തോതിൽ കൃഷി നാശവും റിപ്പോർട്ട് ചെയ്യപ്പെട്ടിട്ടുണ്ട്. തഹസിൽദാറുടെ നേതൃത്വത്തിലുള്ള റവന്യൂ സംഘം ദുരന്തമേഖലയിൽ സന്ദർശനം നടത്തി. വിവിധ വില്ലേജ് അധികൃതർ നാശനഷ്ടങ്ങളുടെ വിലയിരുത്തലും കണക്കെടുപ്പും നടത്തിവരികയാണ്. അടുത്ത ദിവസങ്ങളിൽ നാശനഷ്ടങ്ങളുടെ കണക്ക് കൃത്യമായി ലഭ്യമാകുമെന്ന് തഹസിൽദാർ കെ.എം. ജോസുകുട്ടി പറഞ്ഞു.
