ആസിഫ്അലിയെ സ്വച്ഛതാ ലീഗിന്റെ അംബാസഡറായി നിയമിച്ചതിൽ വിവാദ൦
![](https://i0.wp.com/thodupuzhavartha.in/wp-content/uploads/2022/09/thodupuzha-municipality_710x400xt.jpg?resize=710%2C400&ssl=1?v=1663468148)
![](https://i0.wp.com/thodupuzhavartha.in/wp-content/uploads/2024/06/thodupuzha-second-one.jpg?resize=708%2C397&ssl=1)
തൊടുപുഴ: നഗരസഭയുടെ സ്വച്ഛതാ ലീഗ് ശുചിത്വ പരിപാടിയുടെ ബ്രാൻഡ് അംബാസഡറായി നടൻ ആസിഫ് അലിയെ നിശ്ചയിച്ചതിനെച്ചൊല്ലി കൗണ്സിൽ യോഗത്തിൽ ബഹളം. കൗണ്സിലർമാരുടെ എതിർപ്പിനെ തുടർന്ന് തീരുമാനം പിൻവലിച്ചതായി നഗരസഭാ ചെയർമാൻ അറിയിച്ചു. ഇക്കാര്യം കൗണ്സിലിൽ ചർച്ചക്കെടുക്കാതെ വൈസ് ചെയർപേഴ്സണും ചില നഗരസഭാ ജീവനക്കാരും ചേർന്നാണ് താരത്തെ നിശ്ചയിച്ചതെന്നായിരുന്നു ആക്ഷേപം. നഗരസഭാ ആരോഗ്യ സ്ഥിരം അധ്യക്ഷൻപോലും ഇക്കാര്യമറിഞ്ഞില്ലെന്നും പരാതിയുയർന്നു.
ആസിഫലിയുടെ ഫോട്ടോവച്ച് പരിപാടിയുടെ ലോഗോ പുറത്തിറക്കുകയും ചെയ്തിരുന്നു. ലോഗോ പ്രകാശന ചടങ്ങിനെത്തിയപ്പോഴാണ് താൻ വിവരമറിഞ്ഞതെന്ന് ആരോഗ്യകാര്യ സ്ഥിരം സമിതി അധ്യക്ഷൻ എം.എ. കരിം പറഞ്ഞു. ആസിഫ് അലിയുടെ പിതാവിന്റെ സമ്മതത്തോടെയാണ് അദ്ദേഹത്തെ അംബാസഡറാക്കിയതെന്നാണ് ബന്ധപ്പെട്ടവരുടെ വിശദീകരണം.
നടനെ അംബാസഡറായി നിശ്ചയിക്കുന്പോൾ കൗണ്സിലിൽ അജണ്ട വയ്ക്കുകയോ ആരോഗ്യ സ്ഥിരം സമിതി തീരുമാനമെടുക്കുകയോ ചെയ്തില്ലെന്ന് പ്രതിപക്ഷ കൗണ്സിലർമാരായ കെ. ദീപക്, ജോസഫ് ജോണ്, ടി.എസ്. രാജൻ, സഫിയ ജബ്ബാർ എന്നിവർ കൗണ്സിലിൽ പറഞ്ഞു. നടൻപോലും അറിയാതെയാണ് തീരുമാനമെടുത്തതെന്നും ഇവർ ആരോപിച്ചു.
തിരുവനന്തപുരത്തായിരുന്ന തന്നോട് വൈസ് ചെയർപേഴ്സണ് വിവരം ഫോണിൽ അറിയിക്കുകയായിരുന്നെന്ന് ചെയർമാൻ സനീഷ് ജോർജും വ്യക്തമാക്കി. തർക്കം രൂക്ഷമായതോടെ ഹെൽത്ത് സൂപ്പർവൈസർ കൗണ്സിലിൽ ക്ഷമാപണം നടത്തി. പിന്നീട് തീരുമാനം റദ്ദാക്കാനും അടുത്ത കൗണ്സിലിൽ വിഷയം അജണ്ടയായി കൊണ്ടുവരാനും തീരുമാനിച്ചു. ഇതിനു ശേഷം ആരെ ബ്രാൻഡ് അംബാസഡറാക്കണമെന്ന് തീരുമാനിക്കും. ആസിഫലിയെ അംബാസഡറാക്കുന്നതിൽ എതിർപ്പില്ലെന്നും എന്നാൽ കൗണ്സിലിൽ ചർച്ച നടത്താതിരുന്നതാണ് എതിർത്തതെന്നും പ്രതിപക്ഷ കൗണ്സിലർമാർ പറഞ്ഞു. നഗരത്തിൽ ഇന്നലെ നഗരസഭയുടെ നേതൃത്വത്തിൽ നടത്തിയ ശുചിത്വബോധവത്കരണ റാലിയുടെ ബാനറിൽനിന്നും നടന്റെ ചിത്രം നീക്കിയാണ് റാലി നടത്തിയത്.
![](https://i0.wp.com/thodupuzhavartha.in/wp-content/uploads/2024/07/poster-thodupuzha-new-one-2-scaled.jpg?resize=708%2C2339&ssl=1)