ടൂറിസം പാതകളിൽ അപകടങ്ങൾ പതിവാകുന്നു
![](https://i0.wp.com/thodupuzhavartha.in/wp-content/uploads/2023/04/download-48.jpg?resize=300%2C168&ssl=1?v=1682576541)
![](https://i0.wp.com/thodupuzhavartha.in/wp-content/uploads/2024/06/thodupuzha-second-one.jpg?resize=708%2C397&ssl=1)
കാഞ്ഞാർ: ഇലവീഴാപൂഞ്ചിറ, വാഗമണ് തുടങ്ങിയ ടൂറിസ്റ്റ് കേന്ദ്രങ്ങളിലേക്കുള്ള റോഡുകളിൽ അപകടങ്ങൾ തുടർക്കഥയാകുന്നു. നൂറുകണക്കിന് വിനോദസഞ്ചാരികൾ വന്നുപോകുന്ന സ്ഥലങ്ങളായിട്ടും മുന്നറിയിപ്പ് ബോർഡുകൾ ഉൾപ്പെടെയുള്ള സുരക്ഷാസംവിധാനങ്ങൾ പലയിടത്തും ഇല്ല. കാഞ്ഞാർ-വാഗമണ് റോഡിന്റെ വീതിക്കുറവും വളവും അപകടങ്ങൾക്ക് കാരണമാകുന്നു.
ഒരു മാസം മുന്പ് പുത്തേടിനു സമീപം കാർ ഇടിച്ച് കൊൽക്കത്ത സ്വദേശി മരിച്ചിരുന്നു. റോഡിന്റെ ടാറിംഗുമായി ബന്ധപ്പെട്ട് മിക്ച്ചർ മെഷീൻ ഉൾപ്പെടെ റോഡിൽ ഇട്ടതിനെത്തുടർന്നാണ് അപകടം നടന്നതെന്നു പ്രദേശവാസികൾ പറഞ്ഞു.
കാഞ്ഞാർ ഭാഗത്തേക്കു വന്ന വിനോദസഞ്ചാരികളുടെ കാർ എതിർദിശയിൽനിന്നു വന്ന വാഹനത്തിൽ ഇടിക്കാതിരിക്കാൻ ശ്രമിച്ചപ്പോൾ റോഡിൽ നിർത്തിയിട്ടിരുന്ന ലോറിയിൽ ഇടിക്കുകയും ലോറിക്കു സമീപം ജോലിയിൽ ഏർപ്പെട്ടിരുന്ന തൊഴിലാളി അപകടത്തിൽപ്പെടുകയുമായിരുന്നു. കഴിഞ്ഞ ദിവസം കാഞ്ഞിരംകവലയിൽനിന്ന് ഇലവീഴാപൂഞ്ചിറയ്ക്കുള്ള റോഡിലും അപകടമുണ്ടായി. ടാറിംഗ് പൂർത്തിയാക്കിയ റോഡിൽ ബാരിക്കേഡുകൾ സ്ഥാപിക്കാതിരുന്നതാണ് അപകടകാരണം. ഇവിടെ കാർ താഴ്ചയിലേക്കു മറിഞ്ഞ് വിനോദസഞ്ചാരികൾക്ക് പരിക്കേറ്റു. വിദൂരസ്ഥലങ്ങളിൽനിന്നു എത്തുന്ന വിനോദസഞ്ചാരികൾക്ക് റോഡിന്റെ അറ്റകുറ്റപ്പണികളും വളവുകളും കയറ്റിറക്കങ്ങളും സംബന്ധിച്ച് സൂചന നൽകുന്ന മുന്നറിയിപ്പ് സംവിധാനങ്ങൾ പലയിടത്തുമില്ല. ഇതാണ് പലപ്പോഴും അപകടങ്ങൾക്കു കാരണമാകുന്നത്.
![](https://i0.wp.com/thodupuzhavartha.in/wp-content/uploads/2024/07/thodupuzha-ad-1-scaled.jpg?resize=708%2C2115&ssl=1)