തൊടുപുഴ: സ്ത്രീകൾക്കെതിരെയുള്ള അതിക്രമങ്ങൾ തടയുന്നതിനായുള്ള അന്താരാഷ്ട്ര ദിനാചരണ പരിപാടികളുടെ ഭാഗമായി ജില്ലാ വനിതാ ശിശു വികസന ഓഫീസിന്‍റെ നേതൃത്വത്തിൽ സൈക്കിൾ റാലി സംഘടിപ്പിച്ചു.
ജില്ലാ ശിശു സംരക്ഷണ യൂണിറ്റിന്‍റെയും ഇടുക്കി സ്റ്റുഡന്‍റ് പോലീസ് കേഡറ്റിന്‍റെയും സഹകരണത്തോടെ സംഘടിപ്പിച്ച റാലിയുടെ ഫ്ളാഗ് ഓഫ് ഡിവൈഎസ്പി കെ. സദൻ നിർവഹിച്ചു. ജില്ലാ വനിതാ ശിശു വികസന ഓഫിസർ എസ്.ഗീതാകുമാരി അധ്യക്ഷത വഹിച്ചു. ജില്ലാ ശിശു സംരക്ഷണ ഓഫിസർ എം.ജി. ഗീത, ജില്ലാ ശിശു സംരക്ഷണ യൂണിറ്റ് ഉദ്യോഗസ്ഥരായ കിരണ്‍ കെ. പൗലോസ്, ഷൈൻ ജോസ്, ജോമറ്റ് ജോർജ്, മുതലക്കോടം സെന്‍റ് ജോർജ് ഹൈസ്കൂൾ എസ്പിസി നോഡൽ ഓഫിസർ ജോബിൻസ് സി. മാത്യു, തൊടുപുഴ സെന്‍റ് സെബാസ്റ്റ്യൻസ് ഹൈസ്കൂൾ അധ്യാപകൻ ജിബിൻ മാത്യു എന്നിവർ പ്രസംഗിച്ചു.
മുതലക്കോടം സെന്‍റ് ജോർജ് ഹൈസ്കൂൾ എസ്പിസി കേഡറ്റുകളും തൊടുപുഴ സെന്‍റ് സെബാസ്റ്റ്യൻ ഹൈസ്കൂൾ വിദ്യാർഥികളും റാലിയിൽ പങ്കെടുത്തു. മങ്ങാട്ടുകവല ബസ് സ്റ്റാൻഡ് പരിസരത്തുനിന്നും ആരംഭിച്ച സൈക്കിൾ റാലി തൊടുപുഴ സിവിൽ സ്റ്റേഷൻ പരിസരത്ത് സമാപിച്ചു.
