തൊടുപുഴ : കാരിക്കോട് – അഞ്ചിരി – ആനക്കയം – കാഞ്ഞാര്‍ റോഡ് നിര്‍മ്മാണത്തിനായി പൊതുമരാമത്ത് വകുപ്പില്‍ നിന്നും 4.93 കോടി രൂപയുടെ ഭരണാനുമതി ലഭിച്ചതായി പി ജെ ജോസഫ് എം എല്‍ എ അറിയിച്ചു. സംസ്ഥാന ബജറ്റില്‍ ഈ റോഡിന്റെ നിര്‍മ്മാണത്തിനായി തുക വകയിരുത്തിയിരുന്നു. സാങ്കേതികാനുമതി ലഭ്യമാക്കി ടെണ്ടര്‍ നടപടികള്‍ ഉടന്‍ ആരംഭിക്കും. നിര്‍മ്മാണ പ്രവൃത്തികള്‍ സമയബന്ധിതമായി പൂര്‍ത്തിയാക്കുമെന്നും ജോസഫ് പറഞ്ഞു. ഈ റോഡ് വീതി കൂട്ടി നിര്‍മ്മിക്കുന്നതിനുള്ള നടപടികളും നടന്നു വരുകയാണ്. ഭൂമി ഏറ്റെടുക്കല്‍ നടപടികള്‍ക്കായി 10.44 കോടി രൂപയുടെ സാമ്പത്തികാനുമതി കിഫ്ബിയില്‍ നിന്നും ലഭിച്ചിട്ടുള്ളതാണ്. സ്ഥലം ഏറ്റെടുക്കലിന്റെ ഭാഗമായി പൊതുമരാമത്ത്, റവന്യൂ വകുപ്പുകളുടെ സംയുക്ത പരിശോധനയും പൂര്‍ത്തിയായി വരുകയാണെന്നും ജോസഫ് പറഞ്ഞു.
