ജില്ലയിലെ ആദ്യ കിഡ്നി മാറ്റിവയ്ക്കൽ ശസ്ത്രക്രിയ വിജയമാക്കി മുതലക്കോടം ഹോളി ഫാമിലി ആശുപത്രി
![](https://i0.wp.com/thodupuzhavartha.in/wp-content/uploads/2022/05/images-22.jpeg?resize=389%2C216&ssl=1?v=1653188227)
![](https://i0.wp.com/thodupuzhavartha.in/wp-content/uploads/2024/06/thodupuzha-second-one.jpg?resize=708%2C397&ssl=1)
തൊടുപുഴ: ജില്ലയിലെ ആദ്യ കിഡ്നി മാറ്റിവയ്ക്കൽ ശസ്ത്രക്രിയ വിജയകരമായി പൂർത്തീകരിച്ച് മുതലക്കോടം ഹോളി ഫാമിലി ആശുപത്രി. പൂമാല സ്വദേശിയായ ഓട്ടോ ഡ്രൈവർ രതീഷ് രാജന് (39) അമ്മ പദ്മാക്ഷിയുടെ കിഡ്നിയാണ് മാറ്റിവെച്ചത് എന്ന് ആശുപത്രി അധികൃതർ പത്രസമ്മേളനത്തിൽ അറിയിച്ചു.
ട്രാൻസ്പ്ലാന്റ് സർജൻ ഡോ.ജോർജ് പി. എബ്രഹാമിന്റെ നേതൃത്വത്തിൽ നെഫ്രോളജിസ്റ്റ് ഡോ. നിഷാദ് രവീന്ദ്രൻ, യൂറോളജിസ്റ്റ് ഡോ. അരവിന്ദ്, അനസ്തേഷ്യ വിഭാഗത്തിലെ ഡോ. എം.എം. തോമസ്, ഡോ. വിനു ജോസ്, ഡോ. ഉഷ ജേക്കബ് എന്നിവരടങ്ങുന്ന സംഘമാണ് കിഡ്നി മാറ്റിവയ്ക്കൽ ശസ്ത്രക്രിയയ്ക്ക് നേതൃത്വം നൽകിയത്.
2016-ൽ രതീഷ് തന്റെ ഒരു കിഡ്നി മറ്റൊരാൾക്കു ദാനം ചെയ്തിരുന്നു. നാലുവർഷം പിന്നിട്ടപ്പോൾ പാന്പുകടിയേറ്റതിനെ തുടർന്ന് രതീഷിന്റെ രണ്ടാമത്തെ കിഡ്നിയുടെ പ്രവർത്തനം തകരാറിലായി. ഇതോടെ 2021 ഡിസംബർ മുതൽ രതീഷിന് ഡയാലിസിസ് വേണ്ടി വന്നു. തുടർന്നാണ് കിഡ്നി മാറ്റിവയ്ക്കാൻ തീരുമാനിച്ചത്. എന്നാൽ കിഡ്നി മാറ്റിവയ്ക്കലിനു വേണ്ടി വരുന്ന ഭാരിച്ച ചെലവ് രതീഷിന്റെ കുടംബത്തിന് താങ്ങാനാവുമായിരുന്നില്ല. ഈ സാഹചര്യത്തിൽ വളരെ കുറഞ്ഞ ചെലവിൽ ഹോളി ഫാമിലി ആശുപത്രി ഈ വെല്ലുവിളി ഏറ്റെടുത്ത് ശസ്ത്രക്രിയ നിർവഹിക്കുകയായിരുന്നു.
രതീഷും കിഡ്നി നൽകിയ അമ്മ പത്മാക്ഷിയും പൂർണ ആരോഗ്യത്തോടെ ആശുപത്രി വിട്ടു. സംസ്ഥാനത്ത് നിലവിലുള്ളതിലും കുറഞ്ഞ നിരക്കിലാണ് ഇവിടെ കിഡ്നി മാറ്റി വയ്ക്കൽ ശസ്ത്രക്രിയ നടത്തിയതെന്ന് ആശുപത്രി അധികൃതർ പറഞ്ഞു. പത്രസമ്മേളനത്തിൽ ആശുപത്രി ഡയറക്ടർ സി. ത്രേസ്യാമ്മ പള്ളിക്കുന്നേൽ, അഡ്മിനിസ്ട്രേറ്റർ സി. മേഴ്സി കുര്യൻ, മെഡിക്കൽ സൂപ്രണ്ട് ഡോ. ജോളി ജോർജ്, ഡോ. നിഷാദ് രവീന്ദ്രൻ, യൂറോളജിസ്റ്റ് ഡോ.ആർ. അരവിന്ദ്, ട്രാൻസ്പ്ലാന്റ് കോ-ഓർഡിനേറ്റർ അനൂപ് ജോസ് എന്നിവരും പങ്കെടുത്തു.
![](https://i0.wp.com/thodupuzhavartha.in/wp-content/uploads/2024/07/thodupuzha-ad-1-scaled.jpg?resize=708%2C2115&ssl=1)