കെഎസ്ആർടിസി ജീവനക്കാരുടെ ശമ്പളം സർക്കാർ ജീവനക്കാരുടെ ശമ്പളത്തിനു തുല്യമായി പരിഷ്കരിച്ചു നടപ്പാക്കും.
തൊടുപുഴ : കെഎസ്ആർടിസി ജീവനക്കാരുടെ ശമ്പളം സർക്കാർ ജീവനക്കാരുടെ ശമ്പളത്തിനു തുല്യമായി പരിഷ്കരിച്ചു നടപ്പാക്കും. 2021 ജൂണിൽ പുതിയ ശമ്പളസ്കെയിൽ നിലവിൽ വരും. 2022 ജനുവരിയിലെ ശമ്പളം മുതൽ പുതിയ നിരക്കിലുള്ള ശമ്പളം ലഭിച്ചുതുടങ്ങും.നിലവിലുള്ള അടിസ്ഥാനശമ്പളം 8,730 രൂപയിൽനിന്നും 23,000 രൂപയായാണ് വർധിപ്പിക്കുക. ഡിഎ 137 ശതമാനം പുതിയ ശമ്പള സ്കെയിലിൽ ലയിപ്പിക്കും. ഫിറ്റ്മെന്‍റ് അലവൻസ് 10 ശതമാനം നിലനിർത്തും. ഗതാഗതമന്ത്രി ആന്‍റണി രാജു കെഎസ്ആർടിസിയിലെ അംഗീകൃത തൊഴിലാളി യൂണിയനുകളുമായി ഇന്നലെ നടത്തിയ ചർച്ചയിലാണ് തീരുമാനം.ഡ്രൈവർ, കണ്ടക്ടർ, മെക്കാനിക് തസ്തികയിൽ ജോലി ചെയ്യുന്ന വനിതാ ജീവനക്കാർക്ക് ആറു മാസം പ്രസവാവധിക്കു പുറമെ 5,000 രൂപ അലവൻസോടു കൂടി ഒരു വർഷത്തെ ശൂന്യവേതനാവധി അനുവദിക്കും.മോട്ടോർ ട്രാൻസ്പോർട്ട് വർക്കേഴ്സ് ആക്ട് അനുസരിച്ച് നിയമപരമായി ഡ്യൂട്ടി പാറ്റേണ്‍ പരിഷ്കരിക്കും. ജോലി മാനദണ്ഡങ്ങൾ പരിഷ്കരിച്ച് ഉത്പാദനക്ഷമത വർധിപ്പിക്കും. 500 കിലോമീറ്റർ വരെയുള്ള ദീർഘദൂര സർവീസുകളിൽ ഡ്രൈവർ കം കണ്ടക്ടറെ നിയോഗിക്കും. അന്തർസംസ്ഥാന ബസുകളിൽ ക്രൂ ചേഞ്ച് നടപ്പാക്കും.ഡ്രൈവർ കം കണ്ടക്ടർ, അക്കൗണ്ടിംഗ് വിഭാഗം എന്നീ പുതിയ കേഡർ തസ്തികകൾ സൃഷ്ടിക്കും. മെക്കാനിക്കൽ ജനറൽ, മെക്കാനിക്കൽ ഓട്ടോ എന്നിങ്ങനെ മെക്കാനിക്കൽ വിഭാഗം രണ്ടായി പുനഃസംഘടിപ്പിക്കും.45 വയസിലധികം പ്രായമുള്ള ജീവനക്കാർക്ക് 50 ശതമാനം ശമ്പളത്തോടുകൂടി അഞ്ചുവർഷംവരെ സർവീസ് ആനുകൂല്യങ്ങൾ നിലനിർത്തിക്കൊണ്ട് അവധി അനുവദിക്കും. പൊതു അവധി 15 ആയും നിയന്ത്രിതാവധി നാലായും നിജപ്പെടുത്തും.
