തൊടുപുഴ: ഇടുക്കി ജില്ലയിലെ ആരോഗ്യരംഗത്ത് പുത്തൻ കാൽവയ്പുമായി ലോകോത്തര മികവിൽ ആധുനിക സംവിധാനങ്ങളോടെ വെങ്ങല്ലൂരിൽ ആരംഭിക്കുന്ന സ്മിത മെമ്മോറിയൽ ആശുപത്രിയുടെ ഉദ്ഘാടനം ആറിനു നടക്കുമെന്ന് ചെയർമാൻ പദ്മഭൂഷണ്‍ ഡോ. സുരേഷ് അഡ്വാനി പത്രസമ്മേളനത്തിൽ അറിയിച്ചു.
രാവിലെ പത്തിന് നഗരസഭ ചെയർമാൻ സനീഷ് ജോർജ് ഉദ്ഘാടനം നിർവഹിക്കും. ജില്ലാ മെഡിക്കൽ ഓഫീസർ ഡോ.എൻ. പ്രിയ, തൊടുപുഴ ഡിവൈഎസ്പി കെ.സദനൻ എന്നിവർ ചടങ്ങിൽ പങ്കെടുക്കും.
11 നിലകളിലായി 2.75 ലക്ഷം ചതുരശ്രയടി വിസ്തീർണത്തിലാണ് പൂർണമായും ശീതീകരിച്ച ആശുപത്രി പൂർത്തീകരിച്ചിരിക്കുന്നത്. 300 ബെഡുകളുള്ള ആശുപത്രിയിൽ എല്ലാവിഭാഗവും പ്രർത്തിക്കും. ഇന്േ‍റണൽ മെഡിസിൻ, ജനറൽ സർജറി, ഓർത്തോപീഡിക്സ്, സ്പൈൻ സർജറി, ഓങ്കോളജി, പൾമനോളജി, യൂറോളജി, പീഡിയാട്രിക്സ്, ഗൈനക്കോളജി, നിയോനാറ്റോളജി, ഡർമറ്റോളജി, ഓഫ്ത്താൽമോളജി, ദന്തൽ സർജറി, നെഫ്രോളജി, കാർഡിയോളജി, സൈക്യാട്രി, ന്യൂറോമെഡിസിൻ ആൻഡ് ന്യൂറോ സർജറി, എമർജൻസി മെഡിസിൻ, സ്പോർട്സ് മെഡിസിൻ തുടങ്ങിയ വിഭാഗങ്ങളിൽ പ്രഗൽഭരായ ഡോക്ടർമാരുടെ സേവനം ഇവിടെനിന്നു ലഭിക്കും.
വിദേശരാജ്യങ്ങളിൽനിന്നും ഇറക്കുമതിചെയ്ത അത്യാധുനിക ഉപകരണങ്ങളാണ് ഓപ്പറേഷൻ തിയറ്ററുകളിലടക്കം സജ്ജീകരിച്ചിട്ടുള്ളത്. ഒരേ സമയം 275 കാറുകൾക്കുള്ള പാർക്കിംഗ് ഏരിയയും സജ്ജീകരിച്ചിട്ടുണ്ട്. ഉദ്ഘാടന ദിവസം മുതൽ ഒരുമാസത്തേക്ക് തെരഞ്ഞെടുത്ത ഡിപ്പാർട്ട്മെന്‍റുകളിൽ സൗജന്യമായി ഡോക്ടറെ കാണാനാകും. ഇതിനു പുറമെ ലാബ് ടെസ്റ്റുകൾക്ക് 50 ശതമാനം ഇളവും നൽകും. സാധാരണക്കാർക്ക് ആശ്രയിക്കാവുന്ന ചികിൽസാ ചെലവും മുറിവാടകയും മാത്രമാണ് ഈടാക്കുന്നതെന്നും അതിനാൽ വാർഡുകൾ ഒഴിവാക്കി മുറികൾ മാത്രമാണ് സജ്ജീകരിച്ചിട്ടുള്ളതെന്നും ചെയർമാൻ പറഞ്ഞു.
എംഡി മോഹിത് സുരേഷ് അഡ്വാനി, ചീഫ് ഓപ്പറേറ്റിംഗ് ഓഫീസർ ഡോ. രാജേഷ് പൈ, അഡ്വൈസർ കേണൽ ഡോ. ചതുർവേദി, മെഡിക്കൽ ഡയറക്ടർ ഡോ. ഗോപകുമാർ എന്നിവരും പത്രസമ്മേളനത്തിൽ പങ്കെടുത്തു. ഫോണ് 04862-200456.
