തൊടുപുഴ: കോഴിക്കോട് എൻഐടിയിൽ നടന്ന ആഗോള സർവകലാശാല സെമിനാറിൽ മലയാളി ഗവേഷണ വിദ്യാർഥിക്ക് അവാർഡ്. ചെന്നൈ ഐഐടി ഗവേഷണ വിദ്യാർഥി ടോം ഡാമിയൻ സെമിനാറിൽ അവതരിപ്പിച്ച പ്രബന്ധത്തിനാണ് അവാർഡ് ലഭിച്ചത്. യുഎസ്എയിലെ വിർജീനിയടെക്, പർഡ്യു, യുകെയിലെ ബാത്ത്, ഓസ്ട്രേലിയയിലെ യൂണിവേഴ്സിറ്റി ഓഫ് ന്യൂ സൗത്ത് വെയിൽസ്, മലേഷ്യയിലെ മൊണാഷ്, ബിർള ഇൻസ്റ്റിറ്റ്യൂട്ടിലെ ബിറ്റ്സ് പിലാനി, എൻഐടി കാലിക്കട്ട് എന്നീ യൂണിവേഴ്സിറ്റികൾ ചേർന്നാണ് ഓണ്‍ലൈൻ സെമിനാർ സംഘടിപ്പിച്ചത്.
കണ്‍സ്ട്രക്ഷൻ മെറ്റീരിയൽസ് ആൻഡ് സ്ട്രക്ച്ചേഴ്സ് എന്ന വിഷയത്തിൽ നടന്ന സെമിനാറിൽ വിവിധ രാജ്യങ്ങളിൽനിന്നുള്ള സിവിൽ എൻജിനിയർമാർ, പ്രഫസർമാർ, ഗവേഷകർ, ഗവേഷണ വിദ്യാർഥികൾ തുടങ്ങി അഞ്ഞൂറോളം പേർ പങ്കെടുത്തു. നിർമാണ മേഖലയുമായി ബന്ധപ്പെട്ട പ്രബന്ധങ്ങളാണ് പ്രധാനമായും കോണ്ഫറൻസിൽ അവതരിപ്പിച്ചത്. ചെന്നൈ ഐഐടി യിൽ അവസാന വർഷ ഗവേഷണ വിദ്യാർഥിയായ ടോം ഡാമിയന്‍റെ പിഎച്ച്ഡി തീസിസുമായി ബന്ധപ്പെട്ടാണ് പ്രബന്ധം അവതരിപ്പിച്ചത്.
കലയന്താനി ഓണാട്ട് ഡാമിയൻ തോമസ്-ആൻസി ദന്പതികളുടെ മകനാണ് ടോം.
