തൊടുപുഴ: ജില്ലയിൽ ഇത്തവണ എസ്എസ്എൽസി പരീക്ഷയെഴുതുന്നത് 11,491 വിദ്യാർഥികൾ. സർക്കാർ സ്കൂളിൽനിന്നു 3,282 പേരും എയ്ഡഡ് വിഭാഗത്തിൽനിന്നു 7,498 പേരും അണ്‍എയ്ഡഡിൽനിന്നു 641 പേരുമാണ് പരീക്ഷയെഴുതുന്നത്. ഇതിൽ 5,938 പേർ ആണ്‍കുട്ടികളും 5,553 പേർ പെണ്‍കുട്ടികളുമാണ്. ഏറ്റവും കൂടുതൽ വിദ്യാർഥികളെ പരീക്ഷയ്ക്കിരുത്തുന്നതു ജിഎച്ച്എസ്എസ് കല്ലാർ സ്കൂളാണ്. ഇവിടെനിന്നു 383 പേർ പരീക്ഷയെഴുതും.
ഏറ്റവും കുറവ് വിദ്യാർഥികളുള്ളത് മുക്കുളം എസ്ജിഎച്ച്എസിലാണ്. നാലു പേർ മാത്രമേ ഈ സ്കൂളിൽനിന്നു പരീക്ഷയെഴുതുന്നുള്ളൂ. കട്ടപ്പന സെന്‍ററിൽനിന്നു 89 സ്കൂളുകളും തൊടുപുഴ സെന്‍ററിൽനിന്നു 73 സ്കൂളുകളുമാണുള്ളത്. കഴിഞ്ഞ വർഷത്തെക്കാൾ എസ്എസ്എൽസി പരീക്ഷയെഴുതുന്ന വിദ്യാർഥികളുടെ എണ്ണത്തിൽ നേരിയ വർധനയുണ്ട്. കഴിഞ്ഞ പ്രാവശ്യം 11,383 പേരായിരുന്നു പരീക്ഷയെഴുതിയത്. ഇത്തവണ 11,491 ആയി ഉയർന്നു.
ഹെൽപ് ലൈൻ തുടങ്ങി
വിദ്യാർഥികൾക്ക് എസ്എസ്എൽസി പരീക്ഷാ സഹായത്തിനായി വിദ്യാഭ്യാസ വകുപ്പും ജില്ലാ ശിശുക്ഷേമ സമിതിയും ഡയറ്റും ചേർന്നുള്ള ഹെൽപ് ലൈൻ ആരംഭിച്ചിട്ടുണ്ട്. ഹലോ മെന്‍റർ, ഡയൽ എ ഫാക്കൽറ്റി എന്ന പേരിലാണ് ഇവ പ്രവർത്തനം ആരംഭിച്ചിരിക്കുന്നത്.
ഇതിന്‍റെ ഭാഗമായി വിദ്യാർഥികൾക്ക് മോട്ടിവേഷൻ ക്ലാസുകളും നടത്തുന്നുണ്ട്. വിജയശതമാനത്തിൽ പിന്നാക്കം നിൽക്കുന്ന വിദ്യാലയങ്ങൾക്കും കുട്ടികൾക്കും വേണ്ടിയാണ് പ്രത്യേക ക്ലാസുകൾ നടത്തുന്നത്.
കൗൺസലിംഗ്
വിഷയാധിഷ്ഠിത സംശയനിവാരണത്തിനും കൗണ്‍സലിംഗിനുമായി ഫോണ് നന്പറുകളും ഒരക്കിയിട്ടുണ്ട്. രക്ഷിതാക്കൾക്കായി പേരന്‍റിംഗ് കൗണ്‍സലിംഗും നൽകും. സംശയനിവാരണത്തിനായി വാട്ട്സ്ആപ്പ് വഴിയും ഇ-മെയിൽ വഴിയും മെന്‍റർമാരെ ഫോണ് മുഖാന്തിരവും ബന്ധപ്പെടാനുള്ള സൗകര്യവുമുണ്ട്.
ഫോണ് നന്പരുകൾ വിദ്യാഭ്യാസ ഉപഡയറക്ടർ വഴി വിദ്യാലയങ്ങൾക്കു കൈമാറും. പത്രസമ്മേളനത്തിൽ ശിശുക്ഷേമസമിതി ജില്ലാ സെക്രട്ടറി കെ.ആർ.ജനാർദനൻ, വിദ്യാഭ്യാസ ഡെപ്യൂട്ടി ഡയറക്ടർ കെ.ബിന്ദു, ശിശുക്ഷേമ സമിതി എക്സിക്യൂട്ടീവ് മെംബർ ബി.ബിനോയി, ഡയറ്റ് ലക്ചറർ ഷാമോൻ ലൂക്ക് എന്നിവർ പങ്കെടുത്തു.
